*मोखाडा तलावाजवळ मोठमोठे खड्डे; अपघाताचा धोका वाढला*
उपअभियंता कार्यालय मोखाड्यात असूनही रस्त्याच्या दुरवस्थेकडे दुर्लक्ष
मोखाडा | सचिन वझरे माझं गावं माझं शहर वृत्तसेवा
मोखाडा शहरातील तलावाजवळील रस्त्यावर मोठमोठे खड्डे पडल्याने नागरिकांना मोठ्या त्रासाला सामोरे जावे लागत आहे.
या खड्ड्यांमुळे वाहनचालकांना जीव मुठीत घेऊन प्रवास करावा लागत आहे.
मोखाडा हा आदिवासी तालुका असून परिसरातील नागरिकांसाठी हे शहर महत्त्वाची बाजारपेठ आहे.
दररोज तालुक्यातील विविध गावांमधून नागरिक खरेदीसाठी मोखाड्यात येत असतात.
त्यामुळे या मार्गावर दिवसभर मोठ्या प्रमाणात वाहनांची वर्दळ असते.
विशेष म्हणजे याच परिसरातून एस.टी. बसची नियमित वाहतूक सुरू असते.
रुग्णवाहिका तसेच इतर अत्यावश्यक सेवांची वाहनेही या मार्गावरून ये-जा करतात.
मोखाडा ग्रामीण रुग्णालयाकडे जाण्यासाठीही नागरिकांना याच मार्गाचा वापर करावा लागतो.
रस्त्यावरील खड्ड्यांमुळे रुग्णवाहिकांच्या प्रवासात अडथळे निर्माण होण्याची शक्यता आहे.
पावसाळ्यात खड्ड्यांमध्ये पाणी साचल्याने त्यांची खोली लक्षात येत नसल्याने धोका आणखी वाढला आहे.
दुचाकीस्वार तसेच ज्येष्ठ नागरिकांना या रस्त्यावरून जाताना मोठी कसरत करावी लागत आहे.
रात्रीच्या वेळी या खड्ड्यांमुळे अपघाताचा धोका अधिकच वाढतो.
लाजिरवाणी बाब म्हणजे मोखाड्यातच सार्वजनिक बांधकाम विभागाचे उपअभियंता कार्यालय आहे.
कार्यालय अगदी जवळ असतानाही रस्त्याच्या दुरवस्थेकडे दुर्लक्ष का केले जात आहे, असा सवाल नागरिकांकडून उपस्थित होत आहे.
संबंधित विभागाने या खड्ड्यांची तातडीने पाहणी करून त्यांची दुरुस्ती करावी, अशी मागणी होत आहे.
विशेषतः रुग्णालयाकडे जाणारा मार्ग असल्याने प्रशासनाने याकडे गांभीर्याने पाहणे गरजेचे आहे.
नागरिकांच्या सुरक्षिततेशी संबंधित प्रश्न असल्याने केवळ पाहणी न करता प्रत्यक्ष काम करण्याची गरज आहे.
खड्डे तातडीने बुजवून रस्ता सुस्थितीत आणावा, अशी मागणी वाहनचालक व नागरिकांनी केली आहे.
अपघात होण्यापूर्वी प्रशासनाने जागे होऊन तातडीने उपाययोजना कराव्यात, अशी नागरिकांची अपेक्षा आहे.
आता तरी संबंधित विभाग या गंभीर समस्येकडे लक्ष देऊन रस्त्याची दुरुस्ती करणार का, याकडे सर्वांचे लक्ष लागले आहे.
